السلام عليكم ....
عدنا بعد فترة راحة، واليوم، بكل حزم، بش نحاول نحكي عالتونسي والكار من منظار مواطن عادي، كل يوم ياخو الكار ... معناها إلي بش نقولوا راهو رأي شخصي .... و راي ميمثلنيش ...
مواطن تونسي، كل يوم نركب الكار، وتصرفات التونسي غريبة برشا ...
نتذكر مرة حكاولي على أجنبي قال :
مانوليو نخافو مالعرب، كان مايتعلموا يطلعو في الكار بنظام ....
والمشهد متاع التونسي وهوة يطلع في الكار يبرز برشا حاجات (منحبش نسميها مشاكل )
باش نحاول نوصف اللي نشوفو ... وكل قدير وقدر.
ساعة أول ماتجي الكار، العباد الكل تهد عليها تجري والدز في بعضها تقول درا شنية بش يربح إلي يوصل لول (هذا الكل على بلاصة ... ) ومرات يحلوا الباب والكار مازالت ماوقفتش ... التونسي ... يقوى عليه ربي ...
حاجة أخرى ، من بين برشــــــــا حاجات منجمتش نفهمها ... ، التونسي علاه معندوش الصبر ؟ علاش ما يستناش الكار اللي مبعدها ؟ والتونسي اللي مش مزروب علاه مايخليش بلاصة لخوه التونسي المزروب ... والتونسي اللي توَصلو كار تخرج كل 5 دقايق، علاه ميخليش بلاصة في الكار اللي تخرج كل 30 دقيقة ، ... علاه التونسي يخمم كان في روحو ؟
واللي يزيد يحير أكثر، أنو نحنا التوانسة ماعناش حتى طرف منطق ...
الكلنا نعرفو اللي الباب يطلع زوز عباد في نفس الوقت، في تونس يطلعو 5 في نفس الوقت، برة أحكي معاهم .... والكلنا نعرفو اللي في باب بوزوز، نعملو زوز صفوف، في تونس كل تونسي بش يطلع في الكار يعمل صف وحدو ... برة أحكي معاهم ... !
وكيف التونسي مزروب ويعرف أنو الكار متمشيش كان مايتسكر الباب، لواه مكبش بيديه وساقيه بش مايخليش الباب يتسكر ؟ لايزي يعطل روحو، ويزيد يعطل لعباد معاه ... وساعات الوقت اللي يضيعو على روحو وعل العباد معاه، تتعدا كار ولى زوز ....
حب المقدمة زادة عند التونسي كبير، حب غير عادي ، دوب مايطلع يبنك من قدام ... ويسكر الطريق عالي طالع مبعدوا ... علاه ؟ حاول تفهم ... بش يهبط ماللول ؟ ماهو أطلع مالاخر ولا أدخل اللداخل وخالي لعباد يطلعو ... !
والمشاكيل والحكايات ما توفيش، من قصان التسكرة، السرقة، الهبوط من باب الصعود والصعود من باب النزول، والسائق اللي يتكيف، والعجلة اللي بش تتفلق، ....
الحاصيل، بش منزيدش نطول عليكم ... أنا نتمنى أنو الواحد يحس شوية بالمسؤولية، ويخمم في مصلحة الناس الكل قبل مصلحتو الخاصة، خاطر هاذيكا هية الطريقة الوحيدة اللي تخلينة النجموا النقدموا... ماحبيتش نزيد نلوج على أسباب التصرفات هاذي، نخليكم تلوجوا وحدكم، ... وفالأخير، نحب نقول إلي نحنا نجموا نقدموا ونحسنوا ونرفعوا تونس الفوق، بركة كل واحد يبدى يبدل في روحو، ويعاون ويوعي غيرو زادة... ونبداو نغيروا في تصرفاتنا في أبسط الأشياء اليومية اللي نعيشوها كل يوم ... يا تونسي حب بلادك !
